Usapang pangkapayapaan at karapatang pantao sa ilalim ni Aquino

Usapang pangkapayapaan at karapatang pantao sa ilalim ni Aquino

Bayan  Pambansang Komiteng Tagapagpaganap  ukol sa  Ika-3 taon ng rehimeng US-Aquino                                                                                                          Hunyo 10, 2103 

Epektibong nagsara na ng pinto ang rehimeng Aquino sa anumang makabuluhang usapang pangkapayapaan sa pagitan nito at ng National Democratic Front Of The Philippines (NDFP). Hindi tinupad ng rehimen ang mga obligasyon nito sa mga naunang kasunduan kabilang na ang JASIG at CARHRIHL. Nanatiling nakakulong ang mahigit 400 bilanggo pulitikal kabilang ang mga konsultant ng NDFP. Tumitindi naman ang mga paglabag sa karapatang pantao sa ilalim ng Oplan Bayanihan, ang bersyon ng rehimeng US-Aquino sa Oplan Bantay Laya. Hindi rin nagbigay ang rehimen ng anumang seryosong mungkahi para sa usapin ng repormang socio-ekonomiko na syang pangalawang agenda sa usapang pangkapayapaan. Tinanggihan ng rehimen ang mas mabilis na “special track” na may layong kagyat na matigil ang armadong tunggalian sa pamamagitan ng komon na deklarasyon para sa mga makabuluhang reporma sa ekonomiya at pulitika.

Bangkarote ang pahayag ng GPH na isusulong nila ang lokal na usapang pangkayapaan dahil bukod sa lumang taktika na ito, wala sa hanay ng rebolusyonaryong kilusan ang makikipag-usap sa GPH sa localized peace talks. Tanging ang NDFP Negotiating Panel lamang ang awtorisadong gumampan sa papel na ito.

Ang realidad ay hindi sumuko o tumiklop ang rebolusyonaryong kilusan sa kabila ng mga banta ng GPH. Sa unang hati ng taon malaganap ang mga taktikal na opensiba ng New People’s Army o NPA sa buong bansa. Naging tampok ang mga aksyong militar laban sa mga yunit ng pulis at militar, mga malalaking kumpanya ng pagmimina, mga malalaking plantasyon, at mga despotikong pulitiko. Anumang pilit ng GPH na sabihing laos na o "insignipikante" na ang pwersa ng NPA at rebolusyonaryong kilusang, taliwas ang nagaganap. Dahil dito, tiyak na hindi matutupad ng AFP ang plano ng Oplan Bayanihan na gawing "insignipikante" ang NPA sa taong 2013.

Sa pag-abandona ng GPH sa usapang pangkapayapaan, pinapakita nito na ang pangunahing porma ng pagtugon ni Aquino sa usapin ng armadong tunggalian sa bansa ay ang paggamit ng pwersang militar at panunupil. Hibang na nakasandig ang papet pasistang rehimen sa AFP at Oplan Bayanihan at sa suporta mula sa US.  Tinitignan ng GPH na paborable sa kanila ang ginagawang rebalancing ng US sa Asya dahil nagbubukas ito ng mas papatinding panghihimasok ng US sa usaping panloob ng bansa, kabilang na ang programang kontra-insurhensya. Sa ilang lugar sa Pilipinas, ginagamit ng US ang disaster response at relief operations bilang tabing sa panghihimasok at tuwirang pakikilahok sa programang kotnra-insurhensya ng rehimen.

 ###