Orasen, Bumangonka Ilocos Sur

Orasen, Bumangonka Ilocos Sur

Ni: Demetrio Ragudo Rafanan

Orasen, agtignay
Wen gayyem, saankan aguray
Itan, ipeksam bukod a kapanunutan
Pigsaam tapnu mangngeg ti kadwan
Kanayun, aginga mangngeg ti intero a pagilian
Mangnamnama. Addadanto dita sikigam
Ti pinagbiruk hustisya ket kadwamto idan
Baliwan, nakaugalian nga madi a kapanunutan
"Sumurot ti ayos" a sarita , masapul nga lipatan
"Bumangonka Ilocos Sur" , iyikkis nga awan pagbutengan

Orasen, agikkis, bumugkaw
“Kuston, Sobran” rebbeng nga ipukkaw
Isubli ti moral, dagiti umili, a napukaw
Wen itan, tumakder ta saanen a maala iti patugaw
Irugi, ti pagrebbengan ken dayaw, intayo aywanan
Idependar, napapateg a galad, prinsipyo ken masakbayan
Ta ayan iti demokasya nu ti turay ket inda bukbukudan?
Ken anya ti pintas ti agbiag nu adda pagbutbutengan?
Billit to pay ket agsangit nu wayawaya ket maawanan
“Bumangonka Ilocos Sur” dagiti saan a nalinteg ket adaywam

Orasen, rebbeng nga maamwam
Dagiti aggatang botos ken mangbutbuteng ket tulisan
Respeto, kenka ken iti pamilyam ,isuda ket awanan
Nakaisemda ngem diay isudat’ mangallilaw, saan a makaluban
Ala ngarud, agkuti, agkarintar, masapul nga rugyanam
Mamatika ken mangnamnama nga adda pay laeng ti masakbayan
Dagiti sairo ken narangas ket mabalin a mapagtalnam
Ti kiinaturedmo, prinsipyom ken dignidad kanyana ket iparupam
Wen, dagitoy a galad ket pagbalinem a kalasag ken badang
“Bumangonka Ilocos Sur” ti pinagbalbaliw ket inkan rugyan

Orasen, agmata tapno makitam ti aglawlaw
Kinabaknang ti probensya,manipud bantay agingat’ taaw
Sanikua ti umili,saan nga dagiti manmanu nga agtuturay
Salakniban, iyadayo ti peligro, masapul dagitoy ti masakbayan
Kapatgan a banag a maisagut kadagiti sumaruno a kaputotan
Anya, itulok mo ngarud nga inda nawnawen ken bukbukudan?
Agtugawka ngarud ken aginbubulag uray indaka tupratupraan?
Agbalinka kadin a nakakatkatawa kadagiti dadduma a pagilian?
Saanka ka sumuko, ipangngeg ti boses a kas gurruod ti amianan
“Bumangonka Ilocos Sur”, ti pinagbalbaliw adda dita im-imam

“Bumangonka Ilocos Sur”, saankan paloko
“Bumangonka Ilocos Sur”, itakder ti dayawmo
“Bumangonka Ilocos Sur”, ti kinarangas ilisim ta biagmo
“Bumangonka Ilocos Sur”, ti biag nga imoral ket umadayo
“Bumangonka Ilocos Sur”, ti botosmo saan mo ilako
“Bumangonka Ilocos Sur”, ti prinsipyom ket itakdermo
“Bumangonka Ilocos Sur”, dagiti pagrebbengam ket itangkenmo
“Bumangonka Ilocos Sur”, salaknibam ti kinabaknangmo
“Bumangonka Ilocos Sur”, panonotem ti masakbayan dagiti annakmo
“Bumangonka Ilocos Sur”, agbalbaliw, ti NAMARSUA’T kakuyogmo

###