Sa madilim na tatlong taon ng “daang matuwid”

Sa madilim na tatlong taon ng “daang matuwid”

Bayan  Pambansang Komiteng Tagapagpaganap  ukol sa  Ika-3 taon ng rehimeng US-Aquino                                                                                                          Hunyo 10, 2103 

Madalas ipangalandakan ni Aquino ang kanyang diumanong “daang matuwid” na may pangakong panagutin ang nagdaang rehimen. Pero ang unang taon ng rehimeng Aquino ay kinakitaan ng kawalang ng kasersyosohan sa paghahabol sa mga mandaramabong at prinsipal na salarin sa malawakang paglabag sa karapatang pantao ng nagdaang rehimen. Nanatili ang paghahari ng kawalang-pananagutan. Dinagdagan pa ito ng nagpapatuloy na mga katiwalian at paglabag sa karapatang pantao sa ilalim ng kasalukuyang rehimen.

Ginawang pokus ng sisi ng kasalukuyang rehimen ang nagdaang rehimeng Arroyo para pagtakpan ang mga kasalanan ng kasalukuyang rehimen. Pero hanggang buladas lang ang nagawa ni Aquino sa usapin ng pagpapanagot kay Arroyo, na ngayon ay nasa hospital arrest sa nag-iisang kaso ng plunder kaugnay ng pondo ng PCSO. Una nang nakapagpyansa si Arroyo sa kasong election sabotage para sa eleksyong 2007 dahil mahina daw ang ebidensya kaugnay nito. Walang naisampang kaso para sa “Hello Garci” election fraud ng 2004 at sa sistematikong paglabag sa karapatang pantao sa ilalim ng rehimeng Arroyo. Si Jun Lozada, na prinsipal na testigo laban kay Arroyo sa kasong NBN-ZTE ay pinabayaan naman ng rehimeng Aquino at hindi tinulungan sa hiwalay na kasong kinaharap nito kaugnay sa Philippine Forrest Corporation. Katunayan, pinahina ng rehimen ang kredibilidad ni Lozada nang i-reappoint  bilang pinuno ng Phil Forrest ang tauhan ni Arroyo na siya ring pangunahing testigo laban kay Lozada.

Itinulak ni Aquino ang pagpapalit ng Ombdusman pero hindi rin ito nangahulugan ng pagabante ng mga kaso laban sa mga tiwaling opisyal. Halimbawa, ibinasura ng Ombdusman ang kasong pandarambong laban sa lahat ng “pabaon generals” .

Bagama’t kinasuhan ang berdugong si Gen. Jovito Palparan, bigo ang mga awtoridad na hulihin siya gayong malakas ang hinala ng mga biktima niya na kinakanlong siya ng mga matataas na opsiyal militar at iba pang makapangyarihang personahe. Ilang mga high-profile na suspek ang hindi pa rin naaaresto ng rehimen, kabilang ang mga tinaguriang mastermind ng pagpatay sa mamamayahag na si Dr. Gerry Ortega ng Palawan. Inaasahang makakapagpyansa naman ang mga pangunahing suspek na mga opisyal at tauhan ng 16th IB na sangkot sa pagpatay sa botanist na si Leonard Co at 2 kasamahan nya. Binigyan naman ng promosyon ang mga opisyal ng AFP na sangkot sa iligal na paghuli at pagtortyur sa Morong 43. 

Sa kabila ng mga buladas ng “daang matuwid”, nagpapatuloy naman ang iba’t ibang porma ng kurapsyon sa ilalim ng rehimeng Aquino. Sumasahol ang suliranin sa burukrata kapitalismo. Sangkot ang mga malalapit na kaibigan, kaklase, kamag-anak, mayor na campaign contributor ng Pangulo at ang iba’t ibang interes sa negosyo ng mga malalaking burgesya komprador. Itinataguyod ng rehimen ang mga kwestyunableng mga proyektong PPP at kontrata na nagbibigay ng mga pribilehiyo at garantiya sa tubo sa mga pribadong negosyo (kabilang na ang mga kroni), habang ibayong pabigat naman ang pinapasa sa mamamayan. Kapansin-pansin din na ang economic team ni Aquino kasama ang iba pang opisyal sa gabinete ay pawang mga kintawan ng malalaking negosyo. Sila ang naglalakad sa interes ng mga lokal at dayuhang negosyante. Halimbawa, ginawan ng paraan ng economic at legal team ni Aquino na mabigyan ng ECC ang X-Stra SMI, ang tinatayang pinakamalakaing dayuhang kumpanya ng mina sa bansa, kahit malaganap ang pagtutol dito ng mamamayan. Ang mga ito ang pinakamalaki at sistematikong porma ng katiwalian sa ilalim ng rehimeng Aquino.

Hindi rin binasura ng rehimeng Aquino ang ilang maanomalyang kontrata na pinagtibay ng mga nagdaang rehimen tulad ng sa MRT 3 na nagbaon sa bansa sa napakalaking utang, ang kwestyunableng kontrata sa PAGCOR Entertainment City na may bahid ng panunuhol (Okada), at maging ang mga maanomalyang kontra sa kuryente na may mga take-or-pay provisions.  Maging ang kwestyunableng pagbili ng Comelec sa mga PCOS machines ay hindi tinutulan ni Aquino.

Pawang buladas lang ang “daang matuwid” sa ilalim ng rehimen. Ipinapakita sa aktwal na pamamahala nito ang pagpabor sa interes ng mga mapagsamantala at sa bulok na kaayusan. Panapanahon, kapag kailangan ng masisisi si Aquino at kapag kailangang mas manlansi ng publiko, pakunwari'y sinusulong ang  pagpapanagot kay Arroyo at mga alipores nito.

Lumilitaw na ngayon mula sa hanay ng  panggitnang pwersa ang mga mas  kritikal o tuwirang bumabatikos sa rehimeng Aquino. Nagpahayag na sila ng pagkadismaya sa kawalan ng aksyon ng rehimen sa mga pangako nitong magsusulong ng “tuwid na daan”. Ilan sa kanila ay naging bahagi din ng malapad na hanay laban kay Arroyo.

###