APELA NG Panlalawigang Alyansa ng mga Magbubukid ng Aurora, Inc. (PAMANA)

APELA NG Panlalawigang Alyansa ng mga Magbubukid ng Aurora, Inc. (PAMANA)

 PARA SA LAHAT NG MGA KAALYADO, KAIBIGAN, SUMUSUPORTA SA MAMAMAYAN NG AURORA NA NALULUGMOK NA SA MATINDING PAGSASAMANTALA AT PAGDURUSA SA KAMAY NG DYNASTIYANG ANGARA AT SA MAPANUPIL NA MGA PATAKARAN NG NA SIYANG LALONG NAGPAPAHIRAP SA DATI NANG NAGHIHIRAP NA MGA MAGSASAKA, MANGGAGGAWANG BUKID, MANGINGISDA AT MGA KATUTUBO SA LALAWIGAN.

 Reference:  Elmer Dayson- Pangalawang Tagapangulo ng Panlalawigang Alyansa ng mga Magbubukid ng Aurora, Inc. (PAMANA)

Ang Aurora Development Master Plan at ang APECO: Ang Buong Aurora Bilang Isang Malaking Ecozone

Sa panahon pa ng rehimeng US-Ramos, nabuo ang komprehensibong programa na Aurora Medium Term Development Plan o Aurora Development Master Plan para sa susunod na 25 taon. Ito ay naka-ayon sa programa ng Medium Term Philippine Development Plan na nakabalangkas sa imperyalistang globalization, at ang bersyon nito para sa Gitnang Luzon, ang W-Growth Corridor.  Ang panukalang  pagbubuo ng bagong   rehiyon: North East Pacific Region na binubuo ng mga lalawigan Isabela, Quirino at Aurora.

Inilatag ng Aurora Development Master Plan ang estratehikong papel ng buong Aurora para sa mga dambuhalang negosyo na nakapaloob sa W-Growth Corridor ng Central Luzon. Tuntungan nito ang pagmamaksimisa sa lokasyon ng lalawigan sa Pasipiko at hugpungan ng mga lalawigan sa Hilagang Luzon, Gitnang Luzon at Timog Katagalugan para magsilbing economic zone ang freeport (transhipment basin). Tinitingnan din nito ang potensyal ng lalawigan para sa negosyo ng eko-turismo, at ang lupaing agrikultural, ang kabundukan, ang mayamang karagatan, at kasanayan ng mamamayan sa agrikultura para sa mga negosyong agro-industrial.

Hinulma ng AMTDP ang lalawigan para umayon sa disenyo ng APECO.  Habang dinidinig palang sa kongreso ang pagpapasa sa ASEZA, na kalaunan ay naging APEZA hanggang sa maamyendahan ito naging ganap na batas ang APECO o ang RA 10083, nagaganap na sa lalawigan ang kaukulang pagsasaayos para ibigay ang pangangailangan ng dayuhang negosyo para sa imprastruktura, seguridad, serbisyo at paggawa, at maging ang pahinga at pag-aaliw ng mga imbestor.

Sa ngalan ng hungkag na "development program", naganap ang mga serye ng malawakang pangangamkam ng lupa - pribado at mga produktibong lupang publiko -  para pagtayuan ng iba't-ibang mga proyekto sa ilalim ng Aurora Development Master Plan. Maraming mga komunidad sa iba't-ibang barangay sa baybay dagat ang binabantaang palalayasin para gawing mga beach resorts at tourist spots. Produktibong mga lupain ang naagaw na para sa negosyong "agro-industral". Pumili din ng lokasyon bilang sentro ng APECO at nagsimula na ang panggigipit at pagpapalayas sa mga tao.

Sinabayan ito ng paghihigpit sa kabuhayan ng mamamayan lalo na ng mga nasa mga public lands. Para mapadali ang takbo ng negosyo, nagpagawa ng mga imprastraktura at pasilidad para sa transport, tele-komunikasyon at elektrisidad. Ipinagawa ang mga kalsada na magmumula sa Nueva Ecija at tatagos hanggang sa dulo ng Aurora, mga tulay at duongan. Ginamit ang pangalan ng mga taga-Aurora para makautang sa mga dayuhang bangko kagaya ng JICA, at ng mga interesadong bansa kagaya ng Espanya at South Korea.

Nang maisabatas na ang APECO, pinatibay nito ang legal na balangkas para sa integrasyon, koordinasyon, pagpaplano, pangangasiwa at pagsubaybay sa implementasyon ng Special Economic Zone, at mga kaakibat na aktibidad nito. Inilatag pa nito ang mga insentibo para sa mga dayuhang mamumuhunan gaya ng hindi pagbabayad ng buwis at iba pang proteksyon.

Bagamat limang barangay lamang ang nakasaad sa RA 10083 na sasaklawin ng APECO, tumutukoy lamang ito sa pwesto ng pagtatayuan ng mga pasilidad para sa "industrial estate". Sa aktwal, lampas pa rito ang apektado, dahil ang buong lalawigan naman ang iniaalok sa mga dayuhan, at nakakaranas ng panggigipit. Nililikha ng mga Angara at ng gobyerno ang Aurora bilang isang napakalaking ECOZONE!

Ang Mga Epekto ng APECO

Ayon sa RA 10083, ang site ng APECO ay binubuo ng 2 parsela: (1) Ang unang parsela (mula sa ASEZA) ay ang 496 ektarya na sumasaklaw sa 2 barangay ng Casiguran: Brgy. Estevez at Dibet. (2) Ang ikalawang parsela naman ay may sukat na 12,427 ektarya, na sumasaklaw sa brgy. Cozo, Culat at San Ildefonso na ilalaan bilang special economic zone. Ito ay binubuo ng mga proyektong residential, commercial at industrial, dagdag ang mga ports, ecotourism, mga highway, airport at iba pa. Ang 5 barangay na ito ay may humigit kumulang na 5,430 populasyon. 

Pero mahalaga na tingnan na hindi lamang ang mga ito ang apektado ng APECO. Sa aktwal, ang buong lalawigan at mamamayan ng Aurora ang apektado nito ng tuwiran at hindi tuwiran.

(1) Malawakang pang-aagaw ng mga lupa na ginagamit para sa pagbubukid, kaingin, pangingisda; paninirahan ng komunidad; Nagreresulta ito ng pagkakapalayas ng mamamayang setler at katutubo. Totoo ito kapwa sa actual na impact zone ng dalawang parsela ng APECO, at totoo din sa mga eryang labas ng aktwal na site ng industrial estate sa Casiguran.  Kaakibat na rin nito ang napakaraming kaso ng pagbabawal sa mga nagkakabuhayan sa mga nasa public lands.

(2) Pamumwersa at iba pang paglabag sa karapatang pantao, laluna sa mga tumututol sa APECO.

a. Paggamit ng armadong pwersa. Ang AFP at PNP ay pinaka-aktibong instrumento rito. Partikular na ginagamit ang 48th IBPA, ang 302nd PMG ng PNP, ang Philippine Navy CMOG.

b. Harassment sa mga aktibong tumututol sa APECO gaya ng straffing sa bahay ni Fr. Jofran Talaban na kura paroko ng Casiguran, lider ng PAMANA, JPAG, Bataris at iba pang na  tumutulong sa pag-oorganisa sa mga apektadong mamamayan sa lugar  at mga pananakot sa mga lokal na lider at residente.

c. Hindi rin hiwalay dito ang pagpaslang kay Willem Geertman noong July 3, 2012, isang Dutch missionary, sa mahigit 40 taon niya sa Pilipinas, ang 30 taon nito ay ang pagtulong niya sa mga maralitang mga magsasaka at mga katutubo sa Aurora. Bago siya paslangin ng mga criminal, isa sa sinuportahan niyang laban ay ang laban ng mamamayan laban sa APECO;  Ang pagpaslang kay Waldo Palispis noong June 30, 2012, isang human rights advocates at isa sa namumuno sa kampanya sa pagtutol sa paghahati sa Maria Aurora.

d. Paggamit sa korte ng estado para gipitin at ikriminalisa ang paglaban ng mga mamamayan, at bigyan ng ligal na katwiran ang pagpapaalis sa lupa.

e. Paggamit sa mga ahensya gaya ng DENR at DAR para sikutan ang mga batas at proseso sa pagaari ng lupa

f. Pagbabanta na kakasuhan ang mga nakapususyon sa mga public land dahil sa paglabag sa PD 705 at EO 23,  Bantang kanselasyon ng mga CLOA, EP; Pwersahan pamimili ng lupang pribado, at pambabarat rito; Pwersahang pagbabakod sa lugar na panirahan ng mga mangingisda sa tabing dagat; Panggigipit sa mga barangay opisyal na tumututol sa APECO at panunuhol  sa mamamayang nasa saklaw ng APECO sa pamamagitan ng ng dole out, mapanlinlang at panandaliang mga proyekto.

Batay sa ibinunyag ni Sen. Serge Osmena na si Sen. Angara ang siyang tumatayong President and CEO ng APECO Board, bagay na labag sa katayuan niya bilang halal na opisyal ng gobyerno. 

Ang pinakamalaking panginoong maylupa sa lalawigan ay ang pamilya ng mga Angara, at ang  gobyerno mismo sa tabing ng mga di-umanong mga proyektong pangkaunlaran.  Ang ilan dito ay ang beach resort sa Dingalan, San Ildefonso, Buffalo farm,  lupa sa San Isidro, Dicasalarin, Sabang Suklayin, Reserva; Sa Maria ang Food Basket, Bayanihan, at iba pa; Sa Dipaculao may mga lupain din sa Borlongan, Dianed, Dinadiawan at iba pa; sa Dinalungan, Dilasag sa Diniog at Masagana; Casiguran sa Dipasaleng at ang buong saklaw ng APECO! At patuloy ang pakikibaka ng mamamayan sa Maria Aurora dahil sa kasalukuyang isinusulong na paghahati at pagbubuo ng Dr. Juan C. Angara municipality!

Pilit din nilang ipinipihit ang kasaysayan ng bansa para ipakitang ang mga Angara ay bayani dahil sila ang kumupkop sa mga Kastila nung panahon ng himagsikan ng 1896. (Reference: Baler, movie/Book)

Pinagbubuklod ngayon ang mamamayan ng Aurora ng mga pangangailang ipagtanggol ang lupa at kabuhayan  laban sa pang aagaw ng mga Angara at ng gobyerno ang kalagayan ng uring magsasaka sa lalawigan.

Kaya ang PAMANA ay naninindigan na ang Pakikibaka Laban sa APECO ay Pakikibaka Para Ipagtanggol ang Mamamayan! Pakikibaka laban  sa patuloy na paghahari ng political dynasty sa lalawigan! Nais nilang hawakan ang halos lahat ng pinakamahalagang pwesto sa gobyerno mula sa Senado, kongreso, gobernador, bise gobernador, Mayor, Vice Mayor at hanggang sa mga konsehal ng mga bayan!

Ang pakikibaka laban sa APECO ay pakikibaka para sa lupa ng mga maralitang magsasaka, mangingisda at katutubo sa Aurora, at karugtong ng laban para sa lupa ng buong uring magsasaka sa bansa.

Ito rin ay pakikibaka laban sa dayuhang kontrol sa bansa at bahagi ito ng pakikibaka laban sa imperyalistang globalisasyon.

Ipatupad ang tunay na reporma sa lupa!  Lupa para sa nagbubungkal!Ibasura ang RA 9490 o AZESA of 2007 at RA 10083 o Aurora Pacific Economic Zone and Freeport Act of 2010 (APECO) !

Ibasura ang mga Dinastiyang Angara sa May 2013 Midterm Election!
Ilantad ang sabwatan ng rehimeng Angara-Aquino sa pagpapahirap sa taong bayan!
Please support us in our HATE campaign against Sonny Angara who is running for senator!